Sölvi Geir Ottesen hefur verið funheitur með FC Kaupmannahöfn í Danmörku. Ekki hefur hann bara verið að standa vaktina vel í vörninni heldur hefur hann einnig skorað mikilvæg mörk á hinum enda vallarins.

Hann skoraði líklega sitt mikilvægasta mark á ferlinum þegar hann skoraði með skalla eftir innkast og tryggði sínu liði sigur á Rosenborg í forkeppni Meistaradeildar í síðustu viku. Gjaldkeri danska liðsins hefur væntanlega hoppað hæð sína af kæti því þetta mark tryggir félaginu ansi væna summu vægast sagt.

Á dögunum var síðan dregið í riðlakeppni Meistaradeildarinnar en Sölvi Geir verður fimmti Íslendingurinn til að spila þar. Stórlið Barcelona er í riðli með FC Kaupmannahöfn en þar eru líka Panathinaikos og Rubin Kazan.

Sölvi er fullur sjálfstrausts þessa dagana eins og vera ber og spennandi að sjá hann í komandi landsleikjum gegn Noregi og Danmörku.