„Ég er alveg heill og klár í slaginn," sagði Grétar Rafn Steinsson, leikmaður íslenska landsliðsins og Bolton á Englandi, á blaðamannafundi Íslands sem haldinn var á Laugardalsvelli í dag.

Grétar hefur lítið tekið þátt í æfingum fyrir leikinn en verður þó með á morgun.

„Það var tekið því rólega á æfingum fyrir leikinn enda hefur verið mikil keyrsla hjá mér síðustu vikur. Það var erfiður leikur á sunndaginn sem tók í svo það hafa verið rólegheit. Það sem skiptir máli er að vera í standi þegar leikur hefst á föstudag, það telur ekkert að vera bestur á æfingunum fyrir leik. Ég verð klár þegar flautað verður," sagði Grétar.

Ólafur Jóhannesson landsliðsþjálfari hefur heldur ekki miklar áhyggjur. „Grétar hefur átt í vandræðum með hnéð á sér og við höfum hagað undirbúningi þannig að við séum ekki mikið að þjasnast á honum. Hann hefur átt erfitt með að æfa á fullu og því höfum við farið varlega í sakirnar með hann. Hann verður 100% fit þegar leikurinn hefst," sagði Ólafur.