Breytingar hafa orðið á landsliðshópnum. Þeir Birkir Már Sævarsson og Baldur Sigurðsson koma inn í hópinn í stað Grétars Rafns Steinssonar og Brynjars Bjarnar Gunnarssonar.

Birkir og Baldur fara því með til Danmerkur þar sem næsti leikur fer fram strax á þriðjudag. Liðið flýgur út seinni part laugardags.

Birkir leikur með Brann í Noregi og er eitilharður stuðningsmaður enska liðsins Leeds. Sagan segir að hann spili alltaf í Leeds-búningnum innanundir.

Baldur er Mývetningur sem leikur með KR. Hann hefur átt mjög gott sumar í Pepsi-deildinni og gengur undir gælunafninu smalinn.

Brynjar Björn var ekki í hópnum gegn Noregi í kvöld og er ljóst að hann verður ekki heldur með í Danmörku.  Grétar Rafn var í byrjunarliðinu gegn Norðmönnum, en fór af velli vegna meiðsla og getur ekki tekið þátt í leiknum á þriðjudag.